ឧត្តរមានជ័យ៖ មន្ទីរធនធានទឹក និងឧតុនិយមខេត្តឧត្តរមានជ័យស្នើប្រជាពលរដ្ឋដែលរស់នៅក្បែរៗតំបន់អាងទឹកតាម៉ុកឱ្យមានការប្រុងប្រយ័ត្នខណៈបរិមាណធារទឹកក្នុងអាងហក់ឡើងដល់កម្រិតកម្ពស់ប្រកាសការប្រុងប្រយ័ត្ន។

តាមការឱ្យដឹងពីមន្ទីរធនធានទឹក និងឧតុនិយមខេត្តឧត្តរមានជ័យ នៅថ្ងៃទី៧ ខែកញ្ញា ឆ្នាំ២០២៣ បានបញ្ជាក់ពីស្ថានភាពទឹកនៅទំនប់អាងទឹកតាម៉ុក ស្ថិតនៅឃុំអន្លង់វែង ស្រុកអន្លង់វែង ខេត្តឧត្តរមានជ័យ ដោយសារមានភ្លៀងធ្លាក់នៅថ្ងៃទី៥ ខែកញ្ញា ឆ្នាំ២០២៣ ក្នុងកម្រិត ១០០,១មីលីម៉ែត្រ បានបង្កឲ្យបរិមាណធារទឹកក្នុងអាងហក់ឡើងដល់កម្រិតកម្ពស់ប្រកាសឱ្យមានការប្រុងប្រយ័ត្ន ៣,៨១ម៉ែត្រ នាព្រឹកថ្ងៃទី៧ ខេកញ្ញា ឆ្នាំ២០២៣។

មន្ទីរធនធានទឹក និងឧតុនិយមខេត្តឧត្តរមានជ័យ សំណូមពរដល់ប្រជាពលរដ្ឋដែលរស់នៅក្បែរៗតំបន់អាងទឹកតាម៉ុកឱ្យមានការប្រុងប្រយ័ត្ន និងបញ្ចាក់ថាបើពុំមានភ្លៀងធ្លាក់បន្តនៅថ្ងៃនេះទេទឹក នឹងស្រកចុះវិញនាវេលាល្ងាចថ្ងៃនេះ។

គួរឱ្យដឹងដែរថា កម្រិតកម្ពស់ទឹកឲ្យមានការប្រុងប្រយត្ន័គឺ ៣,៨០ម៉ែត្រ និង កម្រិតកម្ពស់ប្រកាសអាសន្ន ៤,៥០ម៉ែត្រ៕